Breaking News: Abdi Warsame iyo Tarjubaanada Somaaliyeed Oo Guul Weyn Soo hoyay.


Minneapolis: Gudoomiyaha degmada 6’aad Mudane Abdi Warsame ayaa labadii isbuuc lasoo dhaafay dedaal dheer u galay inuu hor-istaago sharciga (SF2177) oo horyaalay labada aqal ee sharci dejinta gobolka Minnesota. Sharcigaan oo la horgeeye mudanaayasha Barlamaanka Gobolka Minnesota ayaa culays iyo xayirad saari lahaa tarjubaanada caafimaadka ka shaqeeya gobolka Minnesota.
 Abdi Warsame oo la hadlaye Xildhibaanadii soo bandhigay xeerka SF2177 ayaa hadaladiisi waxaa kamid ahaa; “Xeerkaan wuxuu shaqo ka fadhiisinayaa boqolaal ruux oo Somaaliyeed, xilli qowmiyadaydi ay 22% shaqa la’aan yihiin.”

Xeerkaan ayaa saameyn ku yeelan lahaa dhaqaalaha ay haatan qaataan tarjubaanada gobolka ay Somaalidu qayb lixaad ka tahay, islamarkaana shuruudo adag kusoo rogi lahaa mulkiilayaasha iyo tarjubaanada madax banana.
Abdi Warsame oo kaashanaya shaqaalaha magaalada Minneapolis ee iskaashiga dowladaha iyo waliba tarjubaanada iyo mulkiilayasha Somaaliyeed ayaa shirar qaas la yeeshay Xildhibaanad labada xisbi. Mudanaha ayaa sharaxay saa’maynta ay ku yeelanayso qowmiyada Somaalida islamarkaana cadeeye in qowmiyada uu matalo aan waxba laga weydiin sharcigaan.

 Dedaal dheer ka gadaal, Abdi Warsame iyo tarjubaanadii garabkiisi ahaa ayaa ku guulayste in sharcigaasi aan la meel marin. “Waxaa mahad leh Ilaahay iyo gabdhihii iyo wiilashii tarjubaanada oo muujiyey isku duubni iyo deedaal,” ayuu yiri Mudane Abdi Warsame.

Si kastaba ha ahaatee, arintani ayaa guul weyn u ah tarjubaanada Somaaliyeed oo horay uga digay khatarta sharcigaasi lasoo bandhigay. Abdi Warsame ayaa kamid ah gudoomiyayaasha degmooyinka magaalada Minneapolis islamarkaana ah xubin katirsan gudiga iskaashiga dowladaha ee magaaladaasi. 

Author: Liban Farah

Editor of Faafiye.com
Host of Faafiye Show
I can be reached by Email at editor@faafiye.com

Share this post