Barlamaanka oo ansixiyay xukuumadda cusub.

Barlamaanka Soomaaliya ayaa Talaadadii Maanta ansixiyay dhammaan tobankii wasiir ee uu magacaabay Ra’iisul-wasaare Cabdi Faarax Shirdoon.

”Barlamaanka ayaa cod buuxa ku ansixiyay xukuumadda cusub kadib markii la tixgaliyay duruufaha adag ee Soomaaliya horyaalla iyo marxaladda nugulka ah ee ay dhex jibaaxayso, iyo waliba markii aan dib u eegid ku sameeynay qorshaha uu soo gudbiyay ra’iisul-wasaaraha iyo xukuumaddiisa,” sida uu Sabahi u sheegay xildhibaan Maxamed Cumar.

Cumar waxa uu sheegay in barlamaanku uu si degdeg ah u anxisiyay xukuumadda si “ay shaqadeeda u qabsato”. Waxa uu sheegay in ay codeeyeen 225 xildhibaan, iyada oo 219 ku codeeyeen ogolaasho, saddex ku codeeyeen diidmo saddex kalena ka aamuseen.

Xukuumadda waa mid ka mida xukuumadihii ugu tirada yaraa ee abid soo mara Soomaaliya waxana ku jira laba haween ah, gaar ahaan haweeneeydii ugu horreeysay ee abid dalka ka noqota wasiirka arrimaha dibadda.

Wakiilka Gaarka ah ee Qaramada Midoobay u qaabilsan Soomaaliya Augustine Mahiga ayaa soo dhaweeyay ansixinta golaha xukuumadda.

“Tani waa dhacdo kale oo taariikhi ah oo ay Soomaaliya higsatay,” ayuu yiri Mahiga. “Magacaabidda liis nadiif ah oo ka kooban toban wasiir waxa ay guud ahaan calaamad u tahay rabitaanka hoggaanka Soomaaliya ee ku aaddan in uu ka gudbo caqliyaddii hore oo uu la yimaado isbaddal wanaagsan.”

Tags:  Barlamaanka oo ansixiyay xukuumadda cusub, Wasiirada