Xasan Shiikh oo la kulmay Wasiiro

Madaxweynaha Somalia ayaa  Maanta [Dec 20, 2012] Madaxtooyada kula kulmay wasiirka horumarinta Norway iyo  wasiirada maaliyada East Timor oo labada mas’uul isagoo kala hadlay adkeynta  xiriirka ka dhexeeya Soomaaliya iyo dalalkan iyo sidoo loo caawin lahaa  Soomaaliya.

Kulamada dhexmaray Xasan Shiikh iyo wasiirrada oo saxaafaddu  ay dibad-joog ka ahayd ayaa markii uu soo dhamaaday waxaa warsaxaafadeedyo ay  kasoo baxeen Villa Somalia, kuwaasoo looga hadlayo waxyaabihii kulanka lagu soo  qaaday.

Madaxweyne Xasan ayaa ka sheegay shirkii uu la yeeshay wasiirka  horumarinta dalka Norway Heikki Holmas in Dowladihii soo maray dalka la siiyay  dhaqaale fara badan laakiin nasiibdaro aanay jirin wax horumar ah oo laga  gaaray, isagoo xusay inaysan jirin Isbitaal ama Iskuul ay Dowladu Maamusho oo  shacbka loogu adeego.

Sidoo kale, Xasan Shiikh wuxuu sheegay in  dowladdiisa ay u baahan tahay in laga taageero sidii lagu sugi lahaa amaanka,  sidoo kalena loo fulin lahaa lixda qodob ee ay dowladdu ka dhiganayso saldhigga  howlaheeda.

Dhanka kale, madaxweynaha ayaa ka sheegay kulankii uu la  yeeshay wasiirada Maaliyada East Timor Emelia Pires in dowladda Soomaaliya ay u  baahan tahay in dhinaca khibradaha dhibaatooyinka dhaqaale ay la wadaagto  dalalka ay dhaqaale xumadu ka jirto.

“Soomaaliya waa dal uu ka buuxo  khayraad fara badan, laakiin waxaa loo baahan yahay in la helo nabad ay dadku  uga faa’iideystaan khayraadka dalkooda ka buuxa” ayuu madaxweyne ka sheegay  shirarkan.

Wasiiradii ka socday Norway iyo East Timor ayaa waxay labaduba  sheegeen inay ku faraxsan yihiin imaanshahooda Muqdisho iyo isbedelka dhacay,  iyagoo sheegay inay gacan ka siinayaan Soomaaliya dhinacyada khibradaha iyo  sidii amaanka lagu soo celin lahaa.

Ayanle Hussien

faafiye team