Xildhibaan Katirsan Maamulka Koonfur Galbeed Oo Baydhabo lagu dilay.
Iska hor’imaadyo culus oo khasaara nafeed dhaliyay ayaa maalintii labaad ka socda gudaha magaalada Baydhabo ee xarunta gobolka Baay.
Wararka ka imaanaya Baydhabo ayaa sheegaya in ciidamo daacad u ah dowladda Federaalka ay toogteen Xildhibaan katirsanaa maamulka Koonfur galbeed islamarkaana ay isku dhowaayeen Mukhtaar Rooboow oo shalay dagaal lagu qabtay.
Goob joogayaal ayaa xaqiijiyay in ladilay Xildhibaan Cabdi shakuur Yacquub Ibraahim xilli uu ku socdaalayay bartamaha magaalada, rasaas xooggan ayaa laga maqlayaa inta badan xaafadaha magaalada.
Ciidamo bishii lasoo dhaafay ay xukuumadda Kheyre diyaarado ku geysay Baydhabo ayaa dagaal culus kula jira maleeshiyo beeleedyo iyo ciidamo daacad u ah Mukhtaar Rooboow.
Jawiga magaalada ayaa ah mid qasan waxaana xiran dhammaan suuqyada waaweyn ee magaalada Baydhabo, ciidamada Xabashida Itoobiya oo dagaalkii shalay ku lug lahaa ayaa maanta aan qeyb ka aheyn colaadda waxayna difaacyo ka xirteen afaafka hore ee saldhigyada ay magaalada ku leeyihiin.
